حیدرآباد: ہفتہ کو بنگلہ دیش کی ایک کم عمر لڑکی حیدرآباد میں چلائے جا رہے Prostitution Racketسے فرار ہو کر سیدھی پولیس کے پاس پہنچ گئی۔ بندلہ گوڑہ پولیس نے لڑکی کو بازیاب کراتے ہوئے تین ملزموں کو گرفتار کر لیا۔
تفتیش میں متاثرہ کی شناخت ڈھاکہ کی رہائشی روحا کے طور پر ہوئی، جو ساڑی ڈیزائننگ کا کام کرتی تھی۔ اسکول جاتے وقت محلے کی ایک خاتون نے اس سے دوستی کی، اس کی خوبصورتی کی تعریف کی اور اسے بھارت میں بہتر زندگی کا جھانسہ دیا۔ اس نے روحا سے کہا کہ اپنے اہل خانہ کو کچھ نہ بتائے اور یہ ظاہر کرے کہ وہ ایک دوست کے ساتھ سفر کر رہی ہے۔
اسمگلنگ اور فروخت
فروری میں اسمگلروں نے اسے کشتی کے ذریعے دریا پار کر کے بھارت لایا، پھر کولکاتا پہنچایا اور بعد میں ٹرین سے حیدرآباد لے آئے۔ یہاں اسے مہدی پٹنم کی رہائشی شہناز کے حوالے کیا گیا، جو خود کو اس کی ماں ظاہر کرتی تھی۔
کچھ ہی دن بعد، سمیر اسے اسماعیل نگر میں حاجرا کے گھر لے گیا۔ حاجرہ نے اسے بتایا کہ اسے جسم فروشی کے لیے لایا گیا ہے اور اگر انکار کیا تو غیر قانونی داخلے کا الزام لگا کر پولیس کے حوالے کر دیا جائے گا۔ گرفتاری کے خوف سے روحا نے ان کی بات مان لی۔ حاجرہ اور شہناز اسے ہوٹلوں میں جسم فروشی کے لیے بھیجنے لگیں۔
فرار اور گرفتاریاں
ہفتہ کی صبح سمیر اسے ایک آٹو میں ہوٹل لے جا رہا تھا جب روحا نے پولیس اسٹیشن کا سائن بورڈ دیکھا۔ ہوٹل پہنچ کر جب سمیر گاڑی پارک کرنے گیا تو وہ موقع پا کر سیدھی بندلہ گوڑہ پولیس اسٹیشن پہنچ گئی۔
پولیس نے حاجرہ بیگم، شہناز فاطمہ اور محمد سمیر کو گرفتار کر لیا، جبکہ روحا کو لانے والا اسمگلر اور اس کا ساتھی سرور فرار ہیں۔ پولیس نے مغربی بنگال سے اسمگل کی گئی دیگر خواتین کو بھی بازیاب کرایا۔ ساؤتھ ایسٹ زون پولیس کے مطابق تحقیقات جاری ہیں۔
About the Author
