حیدرآباد: ناگر کرنول ضلع کے Kalwakurthyمیونسپلٹی میں بدھ کے روز سور چوری کے شبہ میں پیش آئے پرتشدد جھگڑے میں ایک شخص ہلاک اور چار شدید زخمی ہو گئے۔
مہلوک کی شناخت کوند رامولو (عمر 45 سال) کے طور پر کی گئی ہے، جو ویدیا نگر علاقے کا رہائشی اور سور پالنے والا تھا۔ اطلاعات کے مطابق رامولو اور اس کے ساتھیوں کو اطلاع ملی کہ ان کے لاپتہ سور ویلدنڈہ منڈل کے پوتے پلی گاؤں کے قریب ایک شیڈ میں پائے گئے ہیں۔ جب وہ وہاں پہنچے تو مقامی افراد نے ان پر لاٹھیوں اور درانتیوں سے حملہ کر دیا۔
حملہ آوروں کی شناخت ماناپتی وینکٹمّا، پون کمار، شیوا، اشون، اور کرشنا کے طور پر کی گئی ہے۔ ان کے حملے میں رامولو موقع پر ہی ہلاک ہو گیا، جبکہ رام چندری، وینکٹیاہ اور مہیش شدید زخمی ہوئے، جنہیں علاج کے لیے اسپتال میں داخل کروایا گیا ہے۔
رامولو کے اہلِ خانہ نے پولیس پر لاپرواہی کا الزام لگایا ہے۔ ان کا کہنا ہے کہ سور چوری کے واقعات پر پہلے ہی ویلدنڈہ اور کلواکرتی پولیس اسٹیشن میں شکایات درج کی گئی تھیں، مگر پولیس نے کوئی کارروائی نہیں کی۔ ان کا دعویٰ ہے کہ اگر بروقت کارروائی ہوتی تو یہ جان لیوا حملہ ٹالا جا سکتا تھا۔
About the Author
