حیدرآباد: کونڈاپور میں پکڑی گئی Rave Partyکی تحقیقات میں ایک سرکاری عہدیدار کا نام سامنے آنے سے معاملہ سنسنی خیز رخ اختیار کر گیا ہے۔ پولیس نے تصدیق کی کہ آندھرا پردیش کے ڈپٹی تحصیلدار مندیپ ان پارٹیوں کے انعقاد میں کلیدی کردار ادا کرتے رہے ہیں۔
اتوار کی رات پولیس نے قابل اعتماد اطلاع ملنے پر کونڈاپور کے راجاراجیشوری نیلایم سروس اپارٹمنٹس پر چھاپہ مارا۔ یہ کارروائی تلنگانہ ایگل ٹیم اور گچی باؤلی پولیس نے مشترکہ طور پر انجام دی۔
مادھا پور کے ڈی سی پی ڈاکٹر جی وِنییت نے پیر کو بتایا کہ موقع سے چھ افراد کو گرفتار کیا گیا جن میں تیجا، وکرم، نیلما، شراب کی دکان کے مالک پروشوتم ریڈی، سافٹ ویئر انجینئر بھارگو اور انجینئرنگ طالب علم چندن شامل ہیں۔
چھاپے کے دوران پولیس نے 20 گرام کوکین، 20 گرام ایکسٹسی گولیاں اور 3 گرام ایم ڈی ایم اے ضبط کیں۔
تفتیش کے دوران ملزمین نے انکشاف کیا کہ وہ اکثر راجمنڈری میں تعینات ڈپٹی تحصیلدار مندیپ کی طرف سے منعقدہ پارٹیوں میں شریک ہوتے تھے۔ گزشتہ سال گوا میں مندیپ کی میزبانی میں ایک پارٹی کے دوران یہ گروپ بنگلورو کے ڈرگ سپلائر راہل سے ملا، جس کے بعد چندن کے ذریعے راہل سے منشیات منگوا کر حیدرآباد میں پارٹیوں کے لیے استعمال کی جاتی رہیں۔
پولیس نے مندیپ اور راہل دونوں کو اس کیس میں ملزم قرار دیتے ہوئے بتایا کہ وہ فی الحال مفرور ہیں۔ ان کی گرفتاری کے لیے کوششیں جاری ہیں۔
پولیس نے یہ بھی بتایا کہ گرفتار شدہ وکرم پہلے بھی ایک ڈرگ کیس میں پکڑا جا چکا ہے۔ حکام نے کہا کہ اس قسم کی ریو پارٹیوں کو روکنے اور منشیات کی سپلائی چین کا پتہ چلانے کے لیے تلاشی مہم کو مزید تیز کیا گیا ہے۔
